The Scenic Beauty of Munnar
മൂന്നാറില്‍ പലതവണ പോയിട്ടുണ്ടെങ്കിലും മഴക്കാലത്ത്‌ ഇതുവരെ പോയിട്ടില്ല. മഴത്തുള്ളികള്‍ ഇറ്റിറ്റ്‌ വീഴുമ്പോള്‍ മൂന്നാര്‍ കൂടുതല്‍ സുന്ദരിയാകുമെന്ന്‌ പറഞ്ഞുകേട്ടിട്ടുണ്ട്‌. അങ്ങനെയാണ്‌ രണ്ടു സുഹൃത്തുക്കള്‍ക്കൊപ്പം മൂന്നാറിലേക്ക്‌ തിരിച്ചത്‌. തിരുവനന്തപുരത്ത്‌ നിന്ന്‌ രാവിലെ തിരിച്ച ഞങ്ങള്‍ ഉച്ചയ്‌ക്ക്‌ ശേഷം മൂന്നാറിലെത്തി.
തേയിലത്തോട്ടങ്ങളുടെ ഇടയിലൂടെ മൂന്നാറിലേക്ക്‌ പ്രവേശിച്ചപ്പോള്‍ തന്നെ എന്തെന്നില്ലാത്ത ഒരു കുളിര്‍മ അനുഭവപ്പെട്ടു. ഞങ്ങള്‍ എത്തുമ്പോള്‍ മൂന്നാറില്‍ ചാറ്റല്‍മഴ പെയ്യുന്നുണ്ടായിരുന്നു. അവിടെവച്ച്‌ മൂന്നാറിലെ ഒരു സുഹൃത്തും ഒപ്പം കൂടി. കെടിഡിസിയുടെ റിസോര്‍ട്ടായ ടീ കൗണ്ടിയില്‍ നേരത്തെ തന്നെ താമസത്തിനുള്ള സൗകര്യം മൂന്നാറിലെ സുഹൃത്ത്‌ തരപ്പെടുത്തിയിരുന്നു. നേരെ ടീകൗണ്ടിയിലെത്തി, കുളിച്ച്‌ ഫ്രഷായി അഞ്ചുമണിയോടെ ഞങ്ങള്‍ പുറത്തിറങ്ങി.
2010ലെ ഏഷ്യയിലെ ഏറ്റവും മികച്ച രണ്ടാമത്തെ വിനോദസഞ്ചാരകേന്ദ്രമായി മൂന്നാര്‍ തെരഞ്ഞെടുക്കപ്പെട്ടിരുന്നു. മഴക്കാലമാണെങ്കിലും സഞ്ചാരികള്‍ക്ക്‌ ഒരു കുറവുമില്ല. കൂടുതല്‍പേരും അന്യസംസ്ഥാനങ്ങളിലും മറ്റ്‌ രാജ്യങ്ങളിലും നിന്നുമെത്തിയവര്‍. കുറെനേരം കാറിലായിരുന്നു യാത്ര. എന്നാല്‍ കാര്‍ ഒരു ഭാഗത്ത്‌ ഒതുക്കിയശേഷം അല്‍പ്പം നടന്നു. എങ്ങോട്ട്‌ നോക്കിയാലും മനംമയക്കുന്ന ദൃശ്യഭംഗി. ക്യാമറ നമ്മള്‍ ക്‌ളിക്ക്‌ ചെയ്യേണ്ട ആവശ്യമില്ല, പകരം അത്‌ തനിയെ പ്രവര്‍ത്തിക്കുമെന്ന്‌ തോന്നിപ്പോകുന്നു. നേരം ഇരുട്ടിയതോടെ ഞങ്ങള്‍ വീണ്ടും ടീംകൗണ്ടിയിലെത്തി.
Varayadu- A rare species
Kundala- A very famous Picnic spot in Munnar
മൂന്നാറിന്റെ ദൃശ്യഭംഗിക്കൊപ്പം ചന്നംപിന്നം പെയ്യുന്ന മഴ കൂടി ആയപ്പോളാണ്‌ മൂന്നാറിലേക്കുള്ള യാത്രയുടെ ഹരം ശരിക്കും മനസിലായത്‌. ഒരു പകല്‍ ശരിക്കും ദൃശ്യവിസ്‌മയങ്ങളുടേതായിരുന്നു. മടക്കയാത്രയില്‍ മൂന്നാര്‍ ടൗണില്‍ റോഡിന്റെ ഇരുവശത്തും സ്‌ത്രീകള്‍ പഴങ്ങളും പച്ചക്കറികളും വില്‍ക്കുന്നത്‌ കണ്ട്‌ വണ്ടിനിര്‍ത്തി. വളരെ മികച്ച നിലവാരമുള്ള പച്ചക്കറികളാണ്‌ മൂന്നാറില്‍ വില്‍ക്കുന്നതെന്ന്‌ നേരത്തെ കേട്ടിട്ടുണ്ട്‌. ഇതില്‍ ഏറ്റവും പ്രധാനം കാരറ്റും തക്കാളിയും പാഷന്‍ഫ്രൂട്ടുമാണ്‌. ഇവ മൂന്നും വിലപേശിയാണെങ്കിലും കുറെ വാങ്ങി. ഏതായാലും നമ്മുടെ നാട്ടില്‍ കിട്ടുന്നതിനേക്കാള്‍ വളരെ ലാഭകരമായി മൂന്നാറില്‍ നിന്ന്‌ കാരറ്റും തക്കാളിയും വാങ്ങാം. അങ്ങനെ ഞങ്ങള്‍ മൂന്നാറിനോട്‌ തല്‍ക്കാലം വിടപറഞ്ഞു മുന്നോട്ട്‌ നീങ്ങി, വീണ്ടും കാണാമെന്ന വാക്കുമായി.
Tea Conuty- A Finest Destination in Munnar
No comments:
Post a Comment